Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

A pesar de que o tempo de apertura foi máis ben escaso, A corazón aberto. Urxencias arqueolóxicas 1991-1998 resultou unha exposición memorable.

A Casa das Artes de Vigo recibiu numerosísimas visitas de persoas interesadas en coñecer os achádegos arqueolóxicos da cidade. Aqueles que xordiran do corazón urbano nos anos noventa: o primeiro muro romano urbano atopado —baixo o vello edificio Ferro—, o traballo de delimitación da vila romana na illa de Toralla ou as intervencións na rúa do Areal. Para PXC tamén foi memorable; A corazón aberto foi unha das primeiras grandes exposicións nas que traballamos. A través do deseño expositivo e da montaxe debiamos ser capaces non só de difundir o Vigo que agromaba das excavacións, senón a importancia que estaban adquirindo estas intervencións. Coa colaboración dos especialistas na materia, os arqueólogos, a mostra converteuse nun éxito entre a cidadanía.