Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

O colectivo Vertixe Sonora solicitounos colaboración para a difusión e promoción do ciclo de música contemporánea Do Audible, unha proposta de catro concertos noutras tantas cidades: A Coruña (Museo de Belas Artes), Ourense (Liceo), Pontevedra (Facultade de Belas Artes) e Lugo (Casa do Saber).

Patrocinado pola secretaría de Cultura da Xunta de Galicia, Do Audible puña en diálogo a música co pensamento, coa natureza e coa arte. Na liña de traballo de Vertixe Sonora, fúxese da sacralización do feito musical e da súa escoita, intentando que o pouso conceptual e intelectual da composición contemporánea non sexa unha lousa, senón un estímulo para o ouvinte. De aí que neste ciclo Do Audible os concertos estiveran introducidos polo musicólogo Emilio Lede, cunha vontade didáctica, formativa, de acompañamento, de guía para o espectador.