Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

Artistas que operan en Galicia, pertencentes a diferentes xeracións, reuníanse na expo colectiva “O bosquexo do mundo”, comisariada por Ángel Cerviño e Alberto González-Alegre, e coproducida polo MARCO, Museo de Arte Contemporánea de Vigo, o Auditorio de Galicia de Santiago de Compostela, e a Fundación Luis Seoane da Coruña.

O MARCO, que subliñou o esforzo pola produción propia en rede, confiou en PXCultural para a montaxe da mesma. O título da mostra “sérvese da ambigüidade e riqueza do termo ‘bosquexo’, como proxecto ou apuntamento previo á execución dunha obra, e tamén como imaxe mental, como idea latente na mente do artista e no seu ámbito de traballo”. Entre os artistas: Chelo Matesanz, Berta Cáccamo, Din Matamoro, Tatiana Medal, Ignacio Pérez Jofre, Mauro Trastoy e Teo Soriano.