Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

Continuando a liña de propostas de acción cultural no complexo público do Monte Gaiás que iniciamos co aproveitamento didáctico da exposición Typewriter, organizamos para o nadal un taller singular de construción de xoguetes.

O músico e luthier Oli Xiráldez ensinou durante tres días a grupos de nenas e nenos mesturados con persoas adultas a construír enredos sonoros, pequenos e básicos instrumentos musicais feitos de noces, avelás, cana e tanza de pescar. Os obxectivos deste obradoiro da CdC? Promover o diálogo interxeracional, aprender a traballar en equipo, coñecer mellor o patrimonio cultural e, sobre todo, enredar e divertirse.