Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

Onde o mundo se chama Terranova xorde a raíz dunha exposición realizada tres anos antes ao redor da pesca do bacallao no mesmo espazo, o Museo do Mar de Galicia.

Cunha perspectiva antropolóxica, Onde o mundo se chama Terranova tiña como obxectivo achegar aos visitantes a vida a bordo dos bacalloeiros que traballaban nun dos caladoiros máis importantes do mundo. Como transmitir a convivencia, a xerarquía, a alimentación, a comunicación (ou a ausencia dela) ou as tradicións entre os homes que compartían a súa vida medio ano nun barco?

Os traballos de produción da exposición foron intensos mais o resultado pagou a pena xa que a montaxe resultou clave para entender a idea matriz da mostra. Reproducimos un laboratorio, a cuberta do barco, a praia de pesca, o comedor e un camarote; vinculadas a cada unha desas estancias, as proxeccións mostraban as tarefas cotiás realizadas nelas. As testemuñas viñan da man de cinco biólogos que narraban a experiencia nun caladoiro de bacallao que tivo o seu momento de esplendor para as embarcacións galegas nos anos oitenta.

---

---