Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

En PXC encargámonos de producir o acto protocolario que tivo lugar na Fundación Barrié de la Maza polo que o concello de Vigo e a Xunta de Galicia asinaban a adquisición de terreos da finca da ETEA (antiga Escola de Transmisións e Electricidade da Armada) para a posta en marcha da Cidade do Mar.

A operación significaba a recuperación para uso público de máis de trinta e cinco mil metros cadrados de terreo á beira do mar, destinados á investigación mariña. No acto participaban o presidente da Xunta, Emilio Pérez Touriño, o secretario de Estado de Investigación, Carlos Martínez, a delegada da Zona Franca, Teresa Pisano e o alcalde de Vigo, Abel Caballero. As súas intervencións alternábanse coa proxección de imaxes, textos e infografías ilustrativas das futuras instalacións. O acto, de alta voltaxe política e simbólica para a cidade, precisou de varias intervencións no auditorio da Fundación Barrié: plataformas para as intervencións e para a prensa, instalación dunha maqueta, disposición da imaxe gráfica, proxeccións, etc.