Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

A Feira Mundial da Pesca (World Fishing Exhibition) é un evento central para Vigo e Galicia; nela dáse cita a industria pesqueira de todo o planeta.

Da importancia deste evento profesional dá idea o feito de que se celebre cada seis anos e que acudan representacións empresariais de máis de oitenta países. O comité executivo da feira, que preside Alfonso Paz Andrade, encargou a PXC o acto de presentación da edición de 2009, que se celebraría do 16 ao 19 de setembro. Poderiamos definir o evento de presentación, que se localizou na Estación Marítima de Vigo, como unha grande produción efémera na que debería significarse a relevancia da World Fishing Exhibition. Máis de cincocentos convidados, entre eles a daquela ministra de Agricultura e Pesca, Elena Espinosa, participaron nesta presentación para a que deseñamos unha montaxe práctica aínda que efectista cun escenario con fronte en curva de máis de vinte metros de ancho.