Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

Con motivo da celebración da feira das industrias creativas galegas, Culturgal, en decembro de 2010, encargámonos de coordinar a montaxe da exposición Soporte Sonoro no Pazo da Cultura de Pontevedra.

Co comisariado de Xulio Gómez e Xosé Aldea e co patrocinio do programa Creativa, a exposición propuña un percorrido pola historia da gravación e reprodución sonora a través da variedade de aparellos e formatos, do cilindro de cera ao disco compacto, do fonógrafo ao radiocasete, que permitiron a expansión popular de sons e melodías. As pezas expostas en Soporte Sonoro procedían na súa maioría da colección particular de Ernesto Romero e a mostra incluía tamén unha peza estrela: o magnetófono de fío, ideado por Juan Portela Seijo en 1939, que foi cedido pola súa familia. A Escola Sinsal aportaba tamén un conxunto de pezas singulares. Para a montaxe houbo que ter en conta o coidado requirido polas pezas pero tamén o feito de atoparse a mostra nunha feira na que interesaba que o público topase con ela nada máis entrar no recinto. Optouse por unha estrutura de layher para mostrar as pezas e guiar o discurso expositivo.