Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

Comezamos o outono traballando co Servizo de Deportes da Universidade de Vigo para organizar unha gala que pretende ser un escaparate anual, non só do deporte universitario, senón da filosofía e obxectivos dunha universidade moderna e solidaria.

O evento debía ser máis que unha entrega convencional de premios ao estudantado deportista; pretendía ser unha celebración da actividade física e intelectual que se desenvolve nos campus de Vigo, Pontevedra e Ourense. Colaboramos no deseño da estrutura, no guión e na xestión de premios e condución da gala, tarefa para a que tivemos a sorte de contar co xornalista Alfonso Hermida. Tamén axudamos na creación por parte da Universidade dos Premios VIDA e Acción Solidaria, destinados ao recoñecemento do deporte extrauniversitario.

E, por suposto, traballamos na produción do evento in situ, neste caso no Auditorio do Centro Social Novacaixagalicia en Vigo, construíndo unha escenografía tan minimalista como efectiva á hora de dotar de solidez a festa anual do deporte da Universidade de Vigo.

---

---