Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

Colaboramos co Concello de Vigo na produción dunha nova edición de Imaxina Sons en 2013, que inaugurou o fantástico pianista de orixe armenia Tigran no Auditorio Municipal e pechou o acordeonista francés Richard Galliano nun concerto multitudinario na Praza da Constitución. Unha novena edición dirixida por Nani García na que se puxeron en marcha novas actividades como a Academia de Sons, con propostas para todas as idades no MARCO, e Jazz fóra de lugar, unha serie de actuacións de bandas locais en prazas e recunchos da cidade. Sen dúbida, a vaga de calor que tivo lugar durante o festival animou á participación do público nos concertos ao aire libre.