Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

No mes de agosto o Xacobeo encargounos montar no Palazzo Bonacquisti de Assisi (Italia) a exposición “Pellegrino e Nuovo Apostolo” que conmemoraba a peregrinación a Santiago de San Francisco de Asís.

A encomenda non só se refería á montaxe e desmontaxe da exposición, comisariada por Francisco Singul, senón que incluía ademais a produción de elementos, fundamentalmente soportes para determinadas pezas artísticas (peanas, vitrinas, espaldas e mobiliario) que, por cuestións de peso, delicadeza ou ambas, requeríanos. Desprazouse a Asís durante tres semanas un equipo de traballo que contaba con tres especialistas en manipulación de pezas artísticas, dous técnicos en electricidade, un especialista en iluminación e dous coordinadores expertos en montaxe de exposicións. A mostra contaba con pezas de grande relevancia artística e histórica: escultura, instrumentos medievais, retablos, manuscritos, obxectos sacros, etc. Tamén diferentes representacións pictóricas de San Francisco, coa súa imaxe acompañado dunha caveira, como a asinada por O Greco, unha xoia que pertence á Fundación Colexio Nª Sª da Antigua de Monforte de Lemos.