Produción e Xestión Cultural comeza a súa actividade en 1992 e na actualidade é unha das empresas de referencia en Galicia no ámbito da produción cultural. Desenvolvemos os nosos proxectos sen perder de vista os cambios nos hábitos culturais, botando man de novas ferramentas na xestión cultural e atendendo ao papel fundamental das intervencións comunitarias no noso contorno.

A exposición Tempo Escuro estaba centrada nas fotografías do alemán Peter Schneider realizadas na Costa da Morte durante as cinco semanas que seguiron ao accidente do Prestige.

Para reforzar o contexto do oitavo aniversario daquel desastre económico e ecolóxico, construímos para o Museo do Mar unha réplica da bita de proa. Esta era unha peza do barco que tiña un significado relevante para entender o alcance do sinistro xa que a presión da auga no fondo do mar expulsara a tapa da bita de proa permitindo que se liberaran vertidos. Posteriormente atopárase esa tapa, a única peza do Prestige que se conserva en terra e que se podía contemplar na mostra Tempo Escuro xunto á réplica da bita. A dirección do museo tamén nos encargou a realización dunha breve peza de animación que explicase aos visitantes a presión exercida pola auga sobre o barco afundido.